Gschicht

Mer Cleff Waggis sin wie die maischte Clique useme Schyssdräggziigli entstande. 

D´Faszination Fasnacht aggtiiv z’mache isch aigentlich im Kindergaarte z’Basel entstande. Die eerschte Larve, wo meh zämme baschtlet hett, die eerschte glaine Umzüüg, und denn nadyyrlig s’zueluege am Morgestraich oder am Cortège.

Was uns Cleff Waggis damals wie hitte scho bsunders Ydrugg gmacht hett, sin d’Waggis gsi. Ob z’Fuess unterwägs oder witt oobe uff de Wääge, die wilde, faarbige und riisigi Gschtalte mit de groosse Naase und wunderbare Hoorpracht, hän uns Binggis mächtig beiidruggt.

Vyyli Joor speeter, zum Teil nach Abstächer bi traditionelle Clique als Hälfer oder au als Aggtiivmitglieder bi gressere Waageclique, sin e baar vo uns zämme koh und hän entschiede, dass mer au emol wän aggtiiv Fasnacht mache.

Nach vyyle Joor als Schyssdräggziigli hän mer denn dr Wunsch verspürt, das ganze e bitz professioneller welle z’organisiere. Mer hän uns „Cleff Waggis“ als Name zueglegt und en eerschte Waage kaufft, wo mer no hän sälber miesse schtoosse. Mit em Alter und de notwändige finanzielle Mittel, sin mer denn aber rasch uff e greessere Waage umgschtiige, wo vomene Traggdoor hett miesse zooge wärde.

Mittlerwiile sin mer bi unserem vierte Waage akoh und hän unsers 10 Joor Jubileum, wo mer mit euch zämme wän kräftig fiire. Luschtigerwiis sin mer in dene 10 Joor zunere ygschwaisste Gruppe vo 10 Aggtiivmitglieder worde. Zämme mit em Max und em Tobi, unseri treue Traggdoorfahrer, fraie mer uns jedes Joor wie glaini Buebe, wenn d’Fasnachtszyt wieder neecher kunnt. Mer sin denn allerdings au froh, wenn d’Fasnacht amigs wiider vorbyy isch. Denn das ganze zerrt scho an unsere Gräft. Meh wird jo schliessligg au nid jünger 🙂

Es isch au wichtig, dass mer uns do offiziell bi all unsere Famyylie und Frinde bedangge. Ohni eich wär d’Fasnacht a) nid meeglig und b) nid glich scheen!

Usgwählti Foti vo de letschte 10 Joor, wo mer als Cleffs zämme erläbt hän, findet iir in dr Gallerie unte, sowie im Beriich Impressione.

Abschliessend no e glaine Exkurs zu unserem Name „Cleff“. Wie meh vilicht dene Fotene entnimmt, spiilt bi uns viel „Italianità“ mit. Die maischte vo uns sin Secondos, wo in Basel uffgwachse und zum Dail zämme in d’Schuel gange sin. „Cleff“ isch wie „Tschingg“ aigentlich e falsch usgsprochenes Woort. In däm Fall handelt es sich um „Klepfer“. Unseri Eltere hän das, nachdäm sie in d’Schwiz zoge sin, aifach nid richtig
kenne usspräche.

D’Wurscht zelebriere mer somit als Symbol vo unserer Härkunft und als Läggerli, wo zur Fasnacht wie d’Fuscht uffs Aug passt. Mer verteile uss däm Grund au als ainzigi Clique syt Joore regelmässig friischi Klepfer mitemene Sänfli an de Cortège in Basel und Allschwil.