Aggtiiv Fasnacht mache und erlääbe isch öppis ganz Speziells! Und als Waagewaggis spiilsch au e ganz bsunderi Rolle an dr Fasnacht. Mir sind e bitz ruuch, mache uff e eerschte Bligg Angscht mit unserne Larve, de riisige Naase und Zään, aaber mir hänn e groosses Häärz und wärde drotz unserne zum Däil derbe Späss vo allne Bsuecher und Fasnächtler gliebt!
Muesch numme emol die lüüchtende Kinderauge gseh, wenn mir unseri Dääfeli und Orangsche vertaile, ooder au s’Lache im Gsicht vo de erwaggsene Dailnäämer, wenn mir Mimoose, Roose und Klepfer wäärffe. Und wenn’s denn bi kaltem Wätter sogaar no e Schnäpsli gitt, denn kennt d’Froid kaini Gränze.
Aaber wie gseet e düpischs Fasnachtsjoor us?
Normaalerwiis mache mir noch dr Fasnacht emol zerscht e Phause und träffe uns im Summer für e Bummel.
Ab em Heerbscht foot d’Blaanig wiider aa, mir träffe uns, um Uffgoobe z’vertaile, bespräche waas mir andersch ooder besser wänn mache und überleege uns e nois Sujet für‘s näggschte Joor. Eventuell mache mir au scho eerschti glaini Arbeete am Waage.
Im Jänner und im Hoornig isch denn Waagebauzit und zitlich am intensivschte. Das isch aaber au guet so, so goot dr Winter schnäller verbii. Je noch Sujetwaal ka d’Waagearbeet rächt uffwändig si. Aaber au für die weeniger handwärgligg Begabte gitts gnueg z’tue. Schliesslig muess die ganzi Logistigg für d’Fasnacht organisiirt wärde. Beschaffig vom Wuurffmateriaal, Verkauff vo Blagette, Organisazioon vo dr Vernissage und Znachtässe, Routeblaanig so wie Informazioone an Passiivmitgliider, etc.
Du gseesch, jeede ka sich noimeduure iibringe. Und ganz wichtig – es söll au allne Spass mache!
Wenn Du Luscht hesch emol bi uns go ineschnuppere, kontaggtiir uns diräggt: Schigg es Email
